Les mots surlignés font l'objet d'une note
1Reçue à Grenoble, le 31 janvier 1573.
2Monsieur, jay pencé d’accompaigner monsieur du Vilar
3porteur de la presente de mes lectres, sachant
4qu’il sen va devers vous pour ung scien beau frère de
5Gap nommé le capitaine Chappan, auquel on ne permect
6sortir de la ville de Gap, qu’elle demonstration qu’il
7aye sceu faire puys cinq ou six moys en ça du zelle qu’il
8a au parti du roy, ayant entierement sattisfaict à tout
9ce quil a peu pencer estre agreable à sa maiesté
10et à tous ses ministres de justice ; et neaulmoings pour
11quelques particularités daulcungz ses mal veilhantz,
12il est privé de la liberté delaquelle vous permetés
13jouyr en toutes les villes du Daulphiné, ceulx qui
14se sont remis ; et daultant que sa detention luy est
15mervelheusement prejudiciable, ne luy estant seulement
16loysible negocier ses affères au terroit de Gap où
17il a son bien, qu’elles cautions et asseurances quil aye
18presenté, il a esté contraint à ceste occasion se retirer
19à vous, et par le moyen de monsieur du Vilar
20son beau frère le vous faire entendre à ce quil vous plaise
21luy provoyr selon lintention de sa majesté ; et
22daultant que ledit sieur du Vilar est mon allié
23et qui en ses guerres passées ma suyvi faisant
24le service du roy comme ung brave gentilhome, je
25suys esmeu par là me joindre à la requeste quil
26[121 v°] vous veult faire, vous suppliant très humblement de luy
27provoyr à ce qu’il se ressente de votre faveur, et
28que pour sattisfaire aux passions de quelques ungz
29que vous congnoissés bien de la ville de Gap, ledit
30Chappan ne souffre telle incomodité, m’asseurant
31quil est tel quil ne se desvoyera jamais de
32lhobeysance de sa maiesté, ayant dalheurs dequoy
33respondre. Et pour fin de ma lettre je vous
34supplierey me comander voz bonnes volontés ausquelles
35jhobeyrey d’aussy bonne volonté que de mesme
36je prie Dieu,
37Monsieur, quil vous doeint en heureuse santé, très bonne
38vye et longue. De Ventavon, ce XXVe janvier 1573.
39Votre très humble et
40hobeyssant serviteur
41Gargas